Litanie op die hoek van Rabie en Republiek

Rangskikker van die mensdom,
Skilder van kulture,
Komponis van dialekte:

Die diversiteit van U pallet
Bring ons in vervoering (maar soms ook in verwarring).
Die omhelsing van U onbekampte liefde
Vertroetel ons (en maak ons onrustig).

Soms wil ons U bewonder
(oor die paaie wat U loop);
soms wil ons van U vlug
(as U sê: ‘Volg my!’).

Pottebakker van my plooie,
Wewer van my ewige wording,
Regiseur van my ontvouing:

Vandag se verhoog is opwindend (en angswekkend).
Vandag se rolverdeling is divers (maar kompleks).
Vandag se draaiboek is nie wat ek verwag het nie.

Soms wil ons U bewonder
(oor die paaie wat U loop);
soms wil ons van U vlug
(as U sê: ‘Volg my!’).


Skepper, Her-Skepper, God van
Geologie, antropologie, statistiek en sosilogie
Heer, wees ons genadig.
Ontvermer, Verlosser, God van
Politiek, polimiek, ekonomie en retoriek.
Heer, wees ons genadig.
Asem, Beroering, God van
Inspirasie, beweging, kleur en klank.
Heer, wees ons genadig.

Soms wil ons U bewonder
(oor die paaie wat U loop);
soms wil ons van U vlug
(as U sê: ‘Volg my!’).

Amen.